VICEROY EXECUTIVE COUNCIL IN INDIA

Viceroy John Lawrence’s Executive Council in Shimla, 1864

          British sorkar hnuaia Viceroy’s Executive Council lo awm tan dan leh a lo ṭhan chhoh dan hi India ram sorkar kal phung (Indian Constitution) lo piang chhuak zel atana thil pawimawh tak a ni a. A hnuaia step hrang hrang hian a hrilh fiah ang:

                     1. Regulating Act, 1773: He dan hi British Parliament-in India-a East India Company thuneihna thunun nana a siam hmasa ber a ni. Governor-General of Bengal din a ni a (Warren Hastings kha a hmasa ber a ni). Ani pui tur hian Executive Council member 4 an ruat a. He hun lai hian 'Viceroy' tih hming hi a la awm lo va, Governor-General tih a ni rih.

                2. Charter Act of 1833: He dan hian Governor-General of Bengal kha Governor-General of India-ah a hlang kai a. Executive Council-ah hian 'Law Member' (Dàn hre mi) pakhat an belh a, chu chu Lord Macaulay a ni. He Council hian India ram pum huap tùra dan siam thuneihna an nei ṭan a ni.

                       3. Government of India Act of 1858 (Viceroy tih hming lo chhuahna): Kum1857-a Indian-ho an hel (Sepoy Mutiny) hnu-ah, East India Company thuneihna chu ṭhiah a ni a, British Lalnu (Crown) khán thuneihna a la ta a. Governor-General hming chu Viceroy tiin thlak a ni. Viceroy chu Lalnu aiawhtu (representative) a lo ni ta a, a pui turin Executive Council chu sorkar puitling angin a thawk ṭan ta a ni.

             4. Indian Councils Act, 1861 (Portfolio System): Hei hi council tan hmasawnna nasa tak a ni. Lord Canning khan 'Portfolio System' a rawn hmang ṭan a. Council member tinte kha Department (entirnan: Home, Revenue, Military, Finance) bik enkawltu-ah a siam a. Hei hi tun laia kan Cabinet System (Minister-ten Department hran an enkawl hi) lo chhuahna bul chu a ni.

 Council Member-te inthlak Chhoh Dan: 

Kum

Member zát

Thil thleng pawimawh

1773

4 members

Governor-General pui turin din a ni.

1833

4 members

Law Member (Lord Macaulay) belh a ni.

1861

5 members

Portfolio system (Department hrang enkawlna) tan a ni.

1874

6 members

Public Works Department (PWD) enkawltu tur belh a ni.

1909

6 members

Satyendra Prasanna Sinha kha Law Member-ah a ṭhu a, Council-a India mi ṭhu hmasa ber a ni.

NB: Pitt’s India Act, 1784-in member zat 3-ah a titlêm.

 Khàikhâwmna: Viceroy’s Executive Council hi a tirah chuan British officer tlemte, Governor-General thurawn petu mai an ni a. Mahse, kum a liam hnu-ah khan Department hrang hrang enkawltu, sorkar puitling (Cabinet) angah an lo ṭhang chho ta a. A tawpah, 1946-a Interim Government a lo din khan, he Council hi India mi hruaitute (Nehru-a te ho) kutah a lo lut ta a ni.

___________________________________________________________________