Tûn hmá-a Mizorama vái lo len hmá chuan Mizote hi an Lalte awpna hnuai-ah mahni-a ro inrèlin an awm ṭheuh a. Mizo zawng zawngin Sáp-ho hnuaia awm ái chuan an Lalte hnuai-a awm zél chu an duh vek a; Mahse, chú an duhna chuan kal zél theih lohna chin nei-in kum 1890-ah British Sorkar chuan sipai chakna hmangin an rawn bei tá a. Mizoten an hneh loh avàngin an ram chu láksakin an awp tá a ni.
British sorkar chuan awmze nei lo-in rei an awp lo va. British India chhúnga inawp dàn an lo siam, “Scheduled District Act, 1874” chu hmang tùrin kum 1898 khán an lo tifel tawh a. Chú dàn chuan British Sorkar chu ram leilung neitú nihna a pè a. Tin, Mizo Lalte chu an ram enkawl tùr ramrite rinfelsak theihna leh, a ṭúl a nih chuan bàn theihna thlengin thũ a pè ni-a hriat a ni bawk.
Tin, kum 1935 khán British Parliament chuan British India-a Province tinte ro-inrèl dàn tùr “Provincial Autonomy Act” chu a pawm (pass) a. Chú dàn chuan phalna a pêk angin “British India-a hnam hnufual, vàntláng rorèlna la tlin lova ngaihte awmna ram bial (region) te chu Provincial Legislature zawm lovin, Excluded Area-ah British lal berin a puang thei ang” tih a ni. Chumi dàn ang chuan kum 1936 khán hetiang order hi siam a ni “By Order of the King’s Most Excellent Majesty in Council, Lushai Hill was declared to be an excluded Area under the Government of India Act, by order 348 dated April 15, 1936” ti-in. Tichuan, excluded area awmzia chu Assam provincial Legislature-a telh nih vè loh emaw ái-awh nei vè lo ram tihna a ni.
Hé thupêk (order) copy hi Lushai Hills District Cover Pu Anthony Gilchrist McCall (7th January, 1895 – 8th May, 1978) Mizoram Bawrhsáp lehkhabu chhuah phêk 2 na-ah pawh chhuah a ni. Hé lehkhabu hi tihchhuah atán Secretary to the Governor of Assam lehkhá No.4720 G.S. of 7.11.1938-in a rawn pawmpui tá a ni. Anthony Gilchrist McCall hi Indian Civil Service Officer leh British Military Officer a ni.
Tichuan, Mizoram chu British-ho awp lái chuan British India hnuai-a Assam province chhúnga awm ngèi a ni tih chu phat rual a ni lo. Kum 1898-ah chhim leh hmàr suihfin a ni a. Government of India Act of 1919 leh 1935 hnuai-ah chuan hé hmun hi “Backward Tract” ti-a dah a ni. Tin, kum 1898 vêkah hian Mizoram Bawrhsáp hmasa ber ni tùrin Capt. J. Shakespear chu ruat a ni. A hnú-ah “Excluded Area” ah dah a ni bawk. Hemi “Excluded District” nihna ni April 1, 1937-ah hman ṭan a ni. Hei hian chiang takin Assam Provincial Legislature aṭangin paih a ni tih leh a hranpà-in British-in a enkawl a ni tih a lantîr.
Indopui pahnihna (1939 – 1945) lái khan Mizoram chu ramri depah a awm avàngin a rálmuang lo hlê mai a. Japan sipaiten 1942-ah Burma an lák hnú phei kha chuan Mizoram hi a hmun ngaihtuahawm takah a chang chho zui tá a. Aizáwl Bawhsap (Superintendent) Anthony Gilchrist McCall chuan “Total Defence Scheme” siamin Mizo Lal 300 chuang a ko kháwm a. Japan sipaite lo do lêta inbuatsaih dàn tùr ruahmanin “Scorched Earth Policy” an duang a. Japan sipaite chu khua-ah an lút a nih pawhin khaw chhúnga ei tùr an hmuh loh nána thil awm ang ang te hàl chhiat veka tlàn chhuahsan leh a remcháng lái-a lo lambunte pawh a tel a ni.
British Officer-te kaihhruaina hnuai-ah Lushai Brigade dinin an hnà ber pawh Chin Hills vela Japan sipaite chét tlat dàn zir a ni a. ‘Lushai Scouts’ ti pawhin hriat an ni ṭhîn. Battle of Imphal-a Japan sipaite chêt chhiat chhan pawh kha anni vàng hi a ni ti pawhin kan sawi thei ang. A chhan chu Burma aṭanga Japan sipaite ei tùr kengtúte kha tibuai-in an lo kah ṭhîn vàng a ni. Tláng rama British sipai chetláte kha an kaihhruaina tel lo-in an awm thei meuh lo bawk. Mizo tlangvál tam takin Assam Rifles leh Assam Regiment an zawm a. Havildar Rosama phei chu Burma-a Japan sipaite nèn an inbeihna-ah huaisen takin Japan hmá-ah dinga a thih phah avàngin Military Medal pêk a ni.
Kum ruk zet an indo hnú chuan May ni 8-9, 1945-ah Germany chu a tláwm tá a. Japan pawh chu America-in an khawpui pahnih Hiroshima (August 6, 1945) leh Nagasaki (August 9, 1945) ah Atom Bomb an thlâk avàngin a ṭang thei ta lo a; September ni 2, 1945-ah chuan an tláwm phah bawk. Hmun hrang hranga kal Mizo sipaite chuan rilru thar nèn Mizoram chhúng an rawn rap leh tá a. Ram tam takah zalenna-in thlà a zár a. Lushai Hills (Mizoram) pawhin inrẽlbàwlna thar a mamawh ni-in an rawn hre ta a. Tûn hmá-a political party pawh din phal lohnate chu thlah dulin mipuite pawhin politics an ngaihtuah ṭan a. Kum 1946-ah Pu R. Vànlàwma chuan A. MacDonald, Superintendent hnénah political party din phalna a dîl a. Bawrhsap chuan April 9, 1946-ah chuan phalna a pe ta hlauh a ni. A tirah chuan a hmingah “Mizo Commoners Union” tih rawt a ni a. Mahse, April 25, 1946-ah záu záwka mipui koh kháwmna, M.E. Sikulpui-a neihah chuan, party hming atán “Mizo Union” ti-a nemngheh a ni tá a ni.
President : Pu
Pachhúnga
Vice-President : Pu
Lalhèma
Gen. Secy. : Pu
R. Vànlàwma
Asst. Secy. : Pu
Lalbuaia
Treasurer : Pu
Thanga
Fin. Secy. : Pu
Lalhmingthanga
Chhim lam
hruaitúte:
President : Pu
Ch. Sáprãwnga
Vice-President : Pu
R. Dengṭhuama
Secreatry : Pu
H. Vànṭhuama
Aizáwl hmunpui hruaitúte chuan Mizo Union General Assembly hmasa ber neih ni atán ni 24-25.9.1946 an ruat a. A hmun atán Sikulpui, Aizáwl ruat a ni. Ni 24.9.1946-ah rorèlna neih a ni. Ni 25.9.1946-ah inthlanna neih a ni a. A hmá-a Ad hoc-a an hotu lo dah tawh Asst. Secretary hnà leh Financial Secretary hnà chu paih a ni a.
Hotu thlan tharte chu a hnuaia mite hi an ni.
President : Pu
Lalhèma
Gen. Secy. : Pu
R. Vànlàwma
Treasurer : Pu
Lalbuaia
November
15, 1946 inthlana tlingte:
President : Pu Khawtinkhuma MA
Vice-President : Pastor
Záirema B.Sc. B.D.
General
Secy. : Pu H. Vànṭhuama
Treasurer : Pu Lalbuaia
__________________________________
1898 : Chhim leh hmàr chu suihfinin 'Lushai Hills District of Assam' ti-a vuah a ni.
1952 : Assam hnuai-ah Mizo (Lushai Hills) District Council neih a ni.
April, 1954 : Lushai Hills District (Change of Name Act) 1954 hmangin Lushai Hill chu Mizo District tih a ni.
January 1972 : Union Territory-ah Mizo District chu hlànkài a ni a. Mizoram ti-in a hming thlák a ni.
February 20, 1987 : State puitling ni tùra hlànkài a ni ta.
___________________________________
Thank you for your time.
0 Comments