Treasury

TREASURY 

            Treasury tih hi Mizo ṭawng chuan "Sorkar Pawisa In" ti-in kan sawi mai ṭhîn a; mahse, a nihna takah chuan bank pángngái angin pawisà vûm thur hi a awm ngái lo.

 Thiam ang táwkin zirláite leh mipui hriatthiam tùrin sawi fiah ka han tum ang e:

1. Treasury chu eng nge?

Chhànna. Treasury hi Sorkar-in Accountant leh Cashier hna thawk tùra a din a ni a. Sorkar sum luhna (Receipts) leh sum chhuahna (Payments) zawng zawng hi Treasury kaltlang vek a ni ṭhîn.

            Sorkar hnathawk hlawh te, contractor bill te, leh welfare scheme pawisàte hi Treasury-ah hian bill-a thehluh a ni a. Treasury-in a lo pawm (clear) hnú-ah chauh bank-ah pawisà a lút ṭhîn.

 2. "Treasury-ah pawisà a awm lo" tih awmzia.

Chhànna. Politics-a inbeihna-ah leh ṭawngkam dangah te "Treasury-ah pawisà a awm lo" an tih hian, Treasury building-ah pawisà hláwm a awm lo tihna a ni lo va, "Sorkarin a account-ah pawisà (Balance) a nei tawh lo" tihna a ni ber. A tlângpui-in hetiang hunah hian a thleng ṭhîn:

            a) Bill a táng: Sorkar hnathawkin a bill (Medical, Travelling allowance etc) a thehlût a; mahse, Sorkarin RBI-a a account-ah pawisà a neih tawh loh chuan, Treasury chuan chú bill chu a pawm (clear) thei ta lo ṭhîn. Hei hi "Treasury Kharkhip" an tih chu a ni.

            b) Overdraft: Sorkarin RBI aṭanga a pûk theih zát (limit) a pelh chuan RBI-in Sorkar pawisà pêk chhuah zawng zawng a rawn hrènsak (stop payment) ṭhîn a. Chumi hunah chuan Treasury-ah hian eng bill mah a kal thei tawh lo ṭhîn a ni.

 3. Engvangin nge Treasury-ah hian pawisà a  awm loh thut ṭhîn?

Chhànna. Mizoram ang sorkar tán chuan a chhan tlángpui chu:

            a) Central aṭangin sum lo thleng a tlái: Mizoram chu Central Sorkar pawisà (Grant/Tax Share) ring liau liau kan nih avàngin, Central-in pawisà a rawn thlah tlài chuan kan Treasury a "ro" nghál vek ṭhîn.

            b) Chhiah (Tax) kan la tlém: Sorkar hian a sum lák luh (Revenue) ai-a a hmanna (Expenditure - hlawh, pension, loan rulhna) a tam záwk hian sum a tlachham hma ṭhîn.

            c) Financial Year tàwp: March thlà vélah hian department hrang hrangin sum an dil (withdraw) nasa êm êm a. Hemi hunah hian sorkar hi a lo indaih lo thut ṭhîn a ni.

 4. RBI leh Treasury inzawmna: Sorkar hian bank a nei hran lo va, Reserve Bank of India (RBI) hi a bank a ni. Sorkar hian RBI-ah account a nei a. Treasury hian chũ account chu a enkawl (monitor) a ni ber. Treasury-in bill a "pass" chuan RBI-in sorkar account aṭang chuan pawisà a lo vawrh chhuak vè thung ṭhîn.

            Aw le, a chunga ka sawi ang khian, "Treasury-ah pawisà a awm lo" an tih hian, sorkar chuan hman tùr pawisà a neih loh avàngin thil a lei thei tawh lo va, leibá a pe thei tawh lo tihna a ni mai.

 MIZORAM TREASURY

            Mizoram-ah hian Accounts & Treasuries Office hi hmun hnihah a awm a, an hnuaiah hian District hrang hrangah Treasury Office a awm bawk.

            Office Lian (Main Offices) awmna: Aizáwl

            Aizáwl-ah hian office pui pahnih a awm a, an hna khawih a inang lo deuh a ni:

            MINECO, Khatla: Hé hmunah hian Chief Controller of Accounts (CCA) a ṭhú a. A hna khawih berte chu - Establishment & Accounts, Entitlements, GPF, Diarist, Loan & Monitoring te an ni.

            Chanmari (Ramhlun Road): Hé hmunah hian Director (Local Fund Audit & Pension) a ṭhú a. A hna khawih berte chu: Pension, New Pension Scheme (NPS), leh Audit te an ni.

             District Treasury Office-te: District hrang hrangah Treasury Office an awm a, héngte hi a langsàr zual te an ni:

            a) Aizáwl South Treasury: Treasury Square, Aizáwl.

            b) Aizáwl North Treasury: Chánmàri, Aizáwl.

            c) Lunglei Treasury: Lunglei (Southern Zone).

            d) Siaha Treasury: Siaha.

            e) Champhái Treasury: Champhái.

            f) Kolasib Treasury: Kolasib.

            g) Sèrchhîp Treasury: Sèrchhîp.

            h) Lawngtlài Treasury: Lawngtlài.

            i) Màmit Treasury: Màmit.

            Hêng bâkah hian District thar Saitual, Khawzáwl, leh Hnahthial-ah te pawh Treasury Office hi hawn tawh an ni a. Tin, Chawngté leh Tlabung-ah te pawh Treasury hi a awm bawk a ni.

___________________________

I hun min pêk avàngin Ka láwm e.🤝